Siggw iga’q aq Listugujewaq nenaqite’tmi’tij ugjit usgaqan siggwgewei ap maja’s’gtn.

Telpita’qal gesigl na Listugujewaq welta’suatmi’tij ta’n tujiw siggw iga’q aq usgaqan ugjit 2019ewei, gatu amujpana esgmatmi’tij ga’qasgwit’n aq punigju’sgt’n. Ula ta’n teliaq na telimugsi’gw na mimajuinu’gw, maqamigew aq ta’n ne’gaw telapegsig usgewaqan, matnagemgeg ugjit ‘tplutaqanigtug na panta’toqop awti ugjit alsulsumtimg aq elg netuisgemgewei usgewaqan.

Gi’s te’suguna’q esgmajig na Rodney aq Pie’l ugtuluwal nugu’ gisgategl ugjit me’ga’suatm’g na 2019ewei usgaqan.

Amgwes mnawa’tigl aq majugwatmu’gl tapu’gl nmjinigejue’l ‘mtull wesgala’tijig nmjinigejg wejtepta’tijig na ta’n te’s’nijig ignmujig usgalanew. Rodney wejiet apiws’get aq mu goqwei amsala’s’gtnug aq waju’aq ugtul, gatu Pie’l sewisga’s’g ugtul aq wesgowa’sit nesuguna’q elugwatg ugtul aq mu goqwei pegisitug ‘ntuisgetun.

Nige’ Siggewigu’s 11 te’sugunit, Migwite’tm, ula na’gweg na migwite’tmu’g na wetqolugsi’gweg 1981eg, na telia’q ‘ms’t goqwei sa’se’wa’s’g’p Listugujg.

Ta’n telnmitmg: Migwite’tm na ugjit ‘ms’t wen migwite’tmn ta’n tujiw 1981eg wetqolugsi’gweg. Teliaqap miawe’g ge’s plamue’gaqan pemapegsig aq usgewinu’g ginita’jig sipuigtug wesg’tijig. Gisigu’g ‘st’ge’ Matle’n aq Gordon na telimugsieg ta’n telo’timg’p gesgmnaq wetqolugsi’wgweg aq ta’n telo’ltimg’p na gistlia’q ula Listugujg.

Listugujg na Plamu ne’gaw tleiawit ta’n telo’ltimg Mi’gmewigtug, Pam attigna’sit ta’n telugwej angweiwajig Plamu’g.

Alulgwalugw Pam Isaac maw ni’laje’g wen ula Listugujg aq gi’s ne’gaw ango’gt na nme’juaqan ta’n poqjie’was’g’p tet. Pam telimugsi’gw ta’n tes’g goqwei e’was’g ugjit westau’lugsin Plamu aq ta’n telgeligatas’gl sipu’l aq ta’n na plamu gneg se’g ala’sit gatu ‘s’tge’ negm apjiw apaja’sit ula sipu Restigouche.

Blayze gisita’sit ijga’papuaqana’tun nmjinigejuwei usgaqan, aq Walter amujpa ango’tg ugtul muta pusgisuisga’s’g.

Gi’s nugu’ a’qataig gaqaiaq na usgaqan aq Blayze wejo’tg papuaqana’tun ta’n telluguti’tij, ugjit ta’n wen me’ ‘mgntew gelu’lg etliws’timg. Gatu ala amgwesewei gaptnewit Walter Jacques na mawiewle’jg ugtul aq na pusgisuistesg aq mu wellugwenug. Metua’tegeg ugjit gitg – na geligatasijig put’paq neiita’jig ta’n etliws’ti’tij aq ejiglgujig usgewinu’g aq amuj pana megnmi’titl ugloqte’gnmual aq na’te’l puniws’tijig muta puna’tas’g etug usgaqan.

Jill, Ricky aq Oakley na ugjigsu’ltijig gwilmi’tij ta’n usgewaqan aq Mi’gmewi’suti tellugweg sapa’tun ula gm’tginu.

Jill aq Ricky mnawa’tijig suel te’siegsitpu’g aq gismewlia’gwej ta’n tujiw plamuwei usgaqan pemiaq. Gitg pema’tu’tij ta’n i’tliws’timg’pneg ugjit me’ pile’smul wejgwigwenitl: Jill ugwisl Oakleyal. Ap igtig pemapegsig na nemitu’g ta’n teliugjo’tasg ugjit Mi’gmewi’suti me siawa’s’gtn aq siawie’was’gtn, muta ‘s’tge’ plamue’gaqan pemigs’ga’s’g’p aq nige’ pemiapaja’s’g.

Ta’n nujiango’taqatijig sgmawenua’tu’tij sipu aq niganite’tmi’tij apoqonmatmnew.

Ula nige’ pemape’gsig weltesgugig Listugujewe’g Nujiango’taqatijig sgmawenua’tu’tij sipu aq Poqtapei Welp’teg, ‘s’tge’ e’pit aq ugtusl toqwe’gig June aq Ashley, sma’gnis Don Leo aq niganpuguwit Sonny. Gisgug, samqwan ewipg gatu ‘s’tge’ gisigu Pie’l Metallic telimugsieg, mu na ne’gaw telianug na. weja’tegmeg pesgewe’l metewetegl aq matntultimgeg gpno’lewe’g gast’plaq, pegijintultimg’p we’gaw ginenewe’g gast’plaq aq nujiango’taqatijig poqjie’ugeg.

Josh to’q gisita’sit ugjit apajapsnmn ugtlogowaqanm, gaptnewuti muta entoqop muta amujpa nige’ tellugwet ‘s’tge pas’g lugowinuj.

Gaptn Timmy Wysote ugtulg, i’ Gaptnewip Joshua Barnaby nige’ lugowinujuit aq melgllugwet. Gisintoq ugtlugowaqan ugjit Gaptnewuti muta natgoqwei amsala’toqop ‘tpulutaqanigtug, gatu gisita’sit melgllugwet nige’ ugjit apajimsnmn Gaptnewuti. Gatu apaitamg um’tgiwaq weltesgugig mimajuinu’g ta’n waqamnmi’tij utan aq nujo’tmi’tij mesgi’g iga’taqan, e’was’g suliewei ta’n wejiaq usgaqanigtug.

Gasgiptlnaqann Km pi’tawg weja’tegemg Listugujg, a’lutasultijig weltesgua’tijig sma’gnisg ta’n najiatlasmultijig Kedgwick Lodge.

Herbie na wettaqaiet pugwelniji a’lutasultinigij ‘Nnu’g (133 te’sipunqeg) ula Matawamgijuig Wiguom, ta’n na milesultijig aq welnenujig wejguita’jig aq wesg’tijig piamiw gasgiptlnaqan te’sipunqeg. Nige’ Herbie weltesguajig sma’gnisg ta’n amgwesewei peita’lijig. Usgaqan na me’ gegwe’g nige’ je mu amgwes. Kedgwick sipu me’ i’pugwelg’pnaq plamuaq, gatu nige’ mu telpugwelug. Nmitesnug na ta’n tellugutijig nujiapoqonmua’titl plamu’l Listugujg tla’taqatitaq ugjit me’pugwelienew plamu’g ta’n pi’tawita’jig nige’ weja’tegemg.

Usgaqan ijga’ naqa’s’g ugjit miawnipg, gatu Lita aq na ta’n mawlugutijig ugjit Mawio’mi ginita’jig gigpesaq gisna welateg.

Gi’s nige’ miawnipg, nmjinigejgj, jagejg aq plame’gemg usgaqan gaqaiaq, gatu nmjinigejg (gunteweie’jg) ma ‘pije’tnug ‘pqotapegsitew aq na ta’n getana’titl tegiaqasinitl aq pas’g negmow apaqtug alta’taq. Mawglul nige’ pema’tm’g Mawio’mi. Majulwalugw Mawio’mi nujo’tg Lita Isaac, aq ta’n mawlugutijig ula gespiaqantie’uti telapegsig, ijga’ miligisg’g aq pilei apoqonmati neias’g. Aq elg angamugig teluguti’tij usgewinu’g gi’s musga’lug’pnig igtigl pemapegsigl.

Stephen aq ta’n mawlugutijig ugtuluaq GC Macdonald mnawita’jig ugmuljin te’suguna’q getantu’tij puwelpituiptlnaqan engaqann tegwiaq’sitewe’g.

Majulgwalugw Steven Clement aq uglugowinu’g ugtuluwow tegwiaq’stewei mnawita’jig 8-9 i’ te’suguna’q wesg’tijig na mta’n St. Lawrence. Nemitu’g ta’n tela’s’g goqwei wen telippitqatg apaqtug weja’tegemg Penatgewigu’s glapis Gep’tgewigu’s, aq ta’n pilue’g mimajuinu’g amujpana telmawluguti’tij. Pegitqatmu’tijig apaqtug ta’n getu’tlimtu’na’q, jijuaqa ginita’mg melglugutimg aq jijuaqa pas’g etlsiwiem’g. Mueimu’tnigwi wen ugjigsu’g aq witapaq, pas’g ‘mta’n tegeaq’site’gw, gloqontiejg aq ta’nig mawlugutioqig.

Ugwisit aq ujjit toqinmjinegejue’gejig Albert aq Chris amujpa milintawa’qa’tegejig ugjit gaqa’tunew ugna’gwegmuow samqwanigtug.

Ugwisit aq Ujjit Albert aq Chris mnawa’tijig miawnipg aq najiws’jejig. Weliewipg ula na’gweg aq teliangamgug ‘s’tge’ ta’n pas’g tegen na’gweg apaqtug, najiniw ugtuluow poqjiamsala’s’g. Amujpana apoqonmatijig, aq milintawa’qa’tegejig we’gaw gisiawiwsenew. Albert na amgwesewa’t’p ta’n jagejue’gaqanigtug poqjintuwisgep ula Listuguj migguite’g ta’n tujiw amwes usgaqan poqjia’q, ta’n telimtue’g’p negm aq witapaq wetsaputita’pnig ugjit peita’new ta’n eimu’tijig gisgug.

Mu welte’tmi’tigw G’pno’lewe’g usgaqan nujo’tmi’tij gatu Listugujewaq pojijagejue’ga’tijig, elapultijig enmigne’g ugjit me’ alsumsultinew aq ‘ntuisgewei nme’juaqan ula’s’gtn.

Marcus na maw maljewe’j Gaptn na Listugujewe’l mawe’gl tplu’gul. Gi’s nige’ nujo’tg usgaqanei ‘mtul 10 te’sipunqeg nige’ aq maw sa’q tellugwet aq pas’g 23 te’sipuna’t. majulgwalulgwig nige’ muta wesg’tijig ugjit Gm’tginu ula toqwa’q. Gatu muwelte’tas’gtnug muta Listuguj mawa’toq ‘ntuisgewei usgaqan aq na G’pno’ewe’g usgaqan nujo’tmi’tij mu welte’tmi’tigw. Gatu na Pam aq na mawlugutinijig ginita’jig aq wisugwala’tijig jagejg aq muntia’la’tijig ugjit ignmuanew ta’n te’sinitl Gisigu’l ula Listugujg.

Gapitan Franklin Brisk altes’g’g wejteptasgewei nmjinigejgewei, ges esgmat’g’p ugjit ap nujotmn mtul maljewejuijeg ges itl’lugwegej lugowinujuijeg.

Gis ap Franklin Brisk egwit’g samqanigtug.  Pitaqal tan tes ajietl, aq l’gowaqan jijuaqa metueg ugjit gismamunimpan – Listugujewei usgewaqan tan mawi ‘gtantas’g: nmjinigejg.  Gis teleg nige, Gaptnewit, aq na neget telueg mesgig l’gowaqan amujpa pematog muta nige, maw pileism gapitan, aq geggung tan mawi saqawei asoqonmuaqan.  Pel na tlategetew nige jetlia maw piltuegl gogwel, gatu Franklin aq tanig elgutlijig nengaitetmitij oqwaneu gwesowuludas’g mena pilei tepitatag ugtul.  Megatu wet’meg ula mimajuaqan ugjit negm, asuset pugwelgl gwesowuluda’sgl aq tan wigij nnuegatig litugujg, tan me ap negm at’jigtmeg tan tujiw wiguag igaj. Pam Isaac’al ug’gwitl na mawigsatg apoqonmuej – tan tujiw negm imug samqwanigtug elg.  Pam na ugtlgowaqanm na elalj tanig mawlugutij maw Pam’al unaqapeml Carole-Anne Gillis’al aq gisigu Earl Labillois alitelmatitl lumpfish’al muta etlitelmut apajaslital ula Pagtapeg muta sag mu eimug tet.  

Robert aq Shannon gisitasijig git’g ugjit majug’gwatmnew nnu ugplutaqanml ugjit usgalan jagejl, jetlia DFO’al l’gowaqanalugwitij aq wapeg wagei’al, stige amgwes.

Ges alt igtigl ugtanjijl, stige Listugujg, gisitetasgpnn ‘gplutaqann ugjit usgalal japejuaqan maw DFO’al alt igtigig mu weltetmitigup.  Ugjit Sipegne’gatig nnuegati usgewinug Robert aq Shannon Sag, wegaiultimg maw negmow mu na goqwei nige gisgug.  Je tlia tlmigwuatuj Megan Bailey unjigewaj samqwanei wetginamasit Sipegne’gatiewag. Usgewinug mu nsanogoninug ugjit jagej tan telmimajig pa, gatu wejintutitl maw aglasiewg usgewinug, matntultipnig aq je nugwaqatipnig gisalj Robert sespetasin ugjit elmategemg ugjit negm aq wigmag.  Gatu je tlia mst goqwei, Brandon Maloney nujilsutaqatijig nnuegatig elwitmasit ug’tussl geginamaslitl tan tetuji mlgignag tan tujiq jagej wesgaluj. 

Tan tujiw igag ugjit amgwesewin gijuewin, sigti pugwelgewei milamugsit mimajig Gapitan Beverly Denny iljonasit maw nmjinigeja aq Tuna’al.

Angitelmut tuna aq nmjinigejg eptaqanigtug ugjit Gapitan Beverly Denny tlei Pictou Landing, Nopa Scotia.  Negm na tan mawi-amgwesewei Gapitan ug’t’nnuegatimg negm negaw mat’tng, megtm’g, masgelmut aq e’pit’tewelmut.  Ma gatu, alt me gisigug usgewinuug tel’tetmitij winjit ugjit e’pi’litl potigtug tep’pin tan getu tliaq.  Gatu Beverly pa mu nim gaqi’eltetmug ugjit negm.  Gepmiteltasit gapitan, aq espitelmut maw maljewejg stige Austin’al muta getu tl’lugwet stige negm, teltelmut ula e’pit tlei elg samgwanigtug.  Tliaj ugjit welgwijait peitulan 600 ngatignn teligsugunlitl tuna’al gisna sigti’gisoqon natqalan nmjinigejgl.  Beverly na unjig eig negm.  Gatu wigmaq na tmg angitelmaji, aq ma mes’salagul ujijl ugst’qamuilin ges eig apaqtug. 

Alanna Syliboy na mawatog geitaqan maw tan telmimajultimg’p pemnigantesg’g mena munsisapalatal tan mawigsalatl: plamul.

Pa mu nim qaqianug mlgignoti aq sigtiulateget Alanna Syliboy tlei Sipegnegatig etl-mlgignateget ugjit apoqonmuan pemi-enasit plamual Bay of Fundig.  Tesigis’gewei mijipjewei ugjit mij’juaqan tan tesit migmewaj, muta ula plamu tan eig Nopa Scotia pemig’gelejit.  Alanna etl’lugwet maw tanig migmewajg etl’angweiwatij plamug, maw ColdBrook Biodiversity Facility’al tan wej’ginamasultijig plamul, nigwenatijig, aq na elegetijig sipug tan tujiw pemigutijig mena enmiag newte ap usgalatitag ap.  Ula mst goqwei etl’lugutimg mawiag maw saqawei nnuei’ei geitmg maw gisgugewei sigtig’jitas’g, aq na ula tan tel’lugwet Alanna apoqonmaj – ula telitetas’g Etuaptmum’g gisna “Two-eyed Seeing.”

Gis nige tan telpitag gesig, negow usgewinu Durney Nicholas esgmat aq nenaqitetg jagejuei usgaqan panas’gtn ap.

Gis sag usgewinu Gapitan Durney Nicholas tlei Pictou Landing etliwsget gis nige newisgipungegt, tan tujiw jagejuei usgaqan pomtamgiag.  Sangeweg na ula jinm tan tluwenes melgitat tan tujiw metueg eig, gatu tan goqwei mu nemitun, na ula jinm mawi’ulmtog tan tujiw wesgewitut aq giseg na jinm ug’gamlamung sigti’ulmtog. Pana goqwei enmiag petutun samqwanigtug, Durney negm natawigtantog.  Gatu nige pel, pilei l’gowaqanjij eginamasimg ugjit natalugwa-tmnew ula potl etl’tliag nige, aq nige ‘gsmogjataqan gisgajatun tan tes’g pot ugjit wejguwag usgewa’qan. 

Cadence na maljewej migmewaj apjiw apajasit ug’tn’nuegatimg Sipegnegatig, tan etl’gnutasit tan tel petutman maw tanig me natawiwsgtijig sag.

Ula na Cadence Davidson negm na pa mu punieg. Tlei negm Sipegnegatig nnuegatig aq gis nige mu piam sag sasewasit ginamasutil tan wejiep Nopa Scotia’wei aq eliet nnue’ei ginamuoguomg nnuegatig. Ges tapugunaqal nagwegl etliwsgalut jigaw eginamasimg, tet etlginamasit mujga’amgwesewei tan teliwsgemg-pa ‘gjitm na.  Megatu metueg wesgalj nmej, mu telingama-segtnug aq tan tel’tasin.  Nnuegatiewag usgewinug egnutmut ugjit jigawa’al telaslij aq segalut.  Tan tujiw muginamuoguomg eimug, aq gisgajeg maw geitaqan, nige gisgajeg egtanan nmejl newtugwamsij, tan getu tlpitag wesualj.  Gisugu mimajuinu Doreen Pn’nal teluet, ula pilei wejguag tan tel ginamasimg, tan wiaqas’g maw wapeg waqei telmimajij, gneg pegisitog tan amgwes teliaqap nnuegatig, tan tujiw pemiag Shubenacadie’ei ginamuoguomg.  Gatawegemg pegisult’p Anthony Amgwes tan i’tleg’p, aq ula mawigegnueg ugjit negm siawatun maw tanig wejgwitajig. 

Tan teliwsgaluj gataw, Anthony pegisulj tan wet'taqiet, aq tan mawimgotig ugjit negm na siawatun maw nige maljewejg.

Anthony Nicholas na gapitan ugjit tapugul po’tl, newte nmjinigejg’ulg aq igtig na jagejuei’ei tan ula jinm tlei Pictou Landing nnuegatig, gatu ula negm jinm mawigsat’g gatawegej tan tujiw mu tal’lugweg.  Gatawegemg na mesgig’p mitjuaqan amgwes ugjit Migmaq, gatu mesgig enas’g gisgug muta mu wen getanagwig Anthony wigmaq aq mimajuinug.  Ula neiatas’g neiatog Anthony’ewei tapuewei awti, tan, tujiw gesnugwajeg maljewejuijeg, aq tan amgwesewel unjann ugst’qamuilijeg, na tujiw geitoqop tan telimgotig ugjit apsgwatun migmewei gatawegemg. Gatawegemg na tapugul nigtuatigl ugjit tan telmimajip aq tan eliej ugjit negm aq ug’tusl, Sierra.  Aq na ula atugwaqan wejiag amgwes iws’galutup gataw pastung wejiet: gneg wejiet ula gataw Sargasso’ewei samgwan, soqwiet Nopa Scotia’ewel samqwann, tan Anthony aq Sierra etliwsgalatitl, pug’gwanalatitl aq na tujiw gisigumimajuinug es’smujig. 

Chelsea Prosper negm na neiatog, aq musgatog e’pilitl tlei samqwanigtug elg usga’qan

Chelsea Prosper na maljewej tlei Pictou Landing nnuegatig, Nopa Scotia, wejigwet usgewinu wesgalagij jagejg maw ujjl.  Nige tapuisgegipunat, Chelsea aq ugplgogoml Craig na apoqonmatmitij Migmewel menaqajewei ugjit ‘gtanan jagejl.  Chelsea na wijei telginasit ugjit neiatuan igtigig e’pijig maljewejg me eig ugtupun potigtug elg negmow, tlia tan getlimjeseg usga’qan;:agumegw.  Mu na nim piam sagtnug mu gisiwsgalamg’p jagej pa tami gigjiw tajiga-simg samqwanigtug, natami nanisgipunqeg mjegei telategeg’p negow tan gigjiw mulingel tan mejegatogop samqwan, Boat harbour, Gelulg ugjit Pictou Landing’ewei nnuegatig, Saqamaw Andrea Paul unjigewatoqop matnag’gewaqan ugjit waqameg samqwan – aq nige pemiapajas’g gelulg mimajuaqan A’seg (Boat Harbour) tan tujiw mulin gepjaqas’geg. 

Adam Jerome na etl’lugwet samqwanei mimajimg aq mawiet ugjit mawteg jujulsil – etl’lugwet tan mawimqotig tel’lugwemg, aq maw wigapug etlitas’g.

Adam Jerome pana apjiw we’juwet mimajuaqan aq gesatg ugt’nnuegatim Gesgapegiag, aq megitetg ula jugulsil gisiapoqonmatg megnas’g.  Jeluitas’g “Salaweg” na pematog l’gowaqan ugjit nesisgl nnuegatil tan eltogol l’gowaqann mena gisiapoqonmasimg tan ewas’g ‘gtan’g etl milesig.  Tep’pultimg nnuegatiewei pnasulgw ginamatimgeulg, teluisig “Nignag.” Adam neiatu sigw tan mawi amgwesewei samqwan mimajultimg ula Gepeg elwitmasimg Jugulsil nigwenas’g.  Natel, na etl nigwentag sismoqonei jugulsi, tan maw jaqaligwej igatagug ula ugstqamug.  Salaweg na megotig unjigewatog tan mesgig suliewei eltog, aq me etlitog suliewei.

Gapitan Preston Paul algwisit maw tanig etlgnutmasultijig usgewinug tan pitaqal ug’nagwegmulual tan etl winigsg’g aqantieuti getanatijig satasiw.

Natami aqantieuti wes’suwatueg eltaieg ‘gtan maw ula pnasulgw Amstel, wesgelatijig satasiw maw pilei gapitan Preston Paul tlei Gesgapegiag, Gepeg.  Gatu satasiw metuait, aq megotig gas, aq alt maljewejg etl’lugutijig usgewinug tan etl’gnutmasultijig maw Preston, sespetetaqan mesgig ugjit getanuj satasiw usgalan tepiet ugjit teptemn suliewei tepiag.  Gatu tetapu metugunag pejuns’g aq metualujig ula usgewinug aq gatu wejignematultijig maljewejg potigtug, aq ap tatigeg wesgowas’g tan etl’wissugutims, mena mst wen megasit aq mst wen weleg aq welatalultijig.